Uruganda rwa Mironko Plastique barufashe rwiba umuriro w’amashanyazi, rwacanirwaga n’umuriro utanyuze muri konteri

0
292
SANGIZA ABANDI IYI NKURU

Sosiyete ishinzwe Ingufu mu Rwanda (REG) yatahuye uruganda Mironko Plastique rukorera mu mujyi wa Kigali isanga biba umuriro w’amashanyazi. Umuyobozi w’uru ruganda avuga ko ari igikorwa kigayiste, ariko ko nta bushake bwabayeho ngo banyereze amafaranga yagenwe y’igiciro cy’umuriro.

Mu masaha y’igicamunsi kuri uyu wa gatatu tariki 17 Kamena, abakozi ba sosiyete ishinzwe Ingufu mu Rwanda (REG) bakoze ubugenzuzi butunguranye mu ruganda rwa Mironko Plastique basanga biba umuriro w’amashanyarazi.

Ubu bujura bwakozwe hayobywa insinga zifashishwa mu kugenzura umuriro unyura muri mubazi, aho muri uru ruganda basanze inzira ebyiri zigaburira umuriro mu ruganda zarasimbutswe, imwe yonyine ari yo yakoreshwaga inyuze muri mubazi.

Bivuze ko 1/3 cy’amashanyarazi ari yo yabarwaga akanyura muri mubazi akishyurwa, asigaye 2/3 y’ayo bakoreshaga ntiyishyurwe.

Umuyobozi w’Uruganda rwa Mironko Plastique Industry, Mironko Jean Pierre avuga ko atunguwe no gusanga yiba umuriro bitewe no kuba nta bumenyi buhambaye asanganywe mu bijyanye n’amashanyarazi.

Avuga ko amakosa nk’ariya batari kuyabona kuko ngo uru ruganda rumaze imyaka isaga 10, rukora ari uko hari isoko ry’umurimo bahawe, ibizwi nka ‘commande’.

Ati “Ikibazo cyabaye kandi turanakemera, gusa natwe biradutunguye cyane ndetse biratubabaje kuba byiswe ubujura. Bishobora kuba ari ukuri kuko nta bumenyi mbifiteho. Ntabwo ari twe twakoze ibi bintu, uko mubibona natwe ni ko twabibonye.”

Umuyobozi Ushinzwe ubucuruzi muri REG, Karegeya Wilson avuga ko igenzura nk’iri rya bucece risanzwe rikorwa, ari ryo ryanakozwe muri uru ruganda bagasanga rukoresha ingano nini y’umuriro w’amashanyarazi utishyurwa.

Agaragaza ko muri iri genzura rikorwa hagamijwe gutahura abiba amashanyarazi, basanze uru ruganda rwarayobeje umuriro ku buryo bawukoreshaga utabazwe muri mubazi, ko ibikorwa nk’ibi by’ubujura bihombya igihugu kandi bikagira ingaruka ku baturage muri rusange.

Ati “Ibi tubifata nk’ubugizi bwa nabi. Igihombo ku mashanyarazi kigira ingaruka kuri buri wese. Buri wese amenye ko ibikorwa nk’ibi ari bibi, kandi ashishikarire gutanga amakuru kuko uba urengeye byinshi.”

Ubwo twakoraga iyi nkuru, hari hataramenyekana igihe gishize muri ruriya ruganda hadakoreshwa mubazi neza kugira ngo hishyurwe amashanyarazi yose bakoresheje batayishyura.

Karegeya Wilson avuga ko uruganda rutahuwe rwiba amashanyarazi, rutanga miliyoni 10Frw nk’amande asanzwe acibwa ibigo binini iyo bifatiwe mu ikosa nk’iri.

Imibare yo muri 2019, igaragaza ko amashanyarazi atunganywa ku rwego rw’igihugu, agera kuri MW 218, REG ivuga ko 19.6% afite agaciro k’amafaranga miliyari 19Frw  batayacuruza harimo atakarira mu miyoboro ndetse n’ayibwa n’abantu mu nzego zinyuranye.


SANGIZA ABANDI IYI NKURU

LEAVE A REPLY

Please enter your comment!
Please enter your name here