Urukiko ndubwira rimwe, kabiri, gatatu ntirwumve – Rusesabagina yihakana ubunyarwanda

0
202
SANGIZA ABANDI IYI NKURU

Paul Rusesabagina ushinjwa n’ubushinjacyaha ibyaha 13 birimo iby’iterabwoba, yabwiye Urukiko rw’Ibanze rwa Kicukiro ko atumva impamvu yarumenyesheje inshuro zirenze eshatu ko atari Umunyarwanda ariko ntirwite ku magambo ye.

Yabigarutseho ubwo yitabaga urukiko kuri uyu wa Kabiri ubwo hatangiraga kuburanishwa ikirego cyatanzwe n’Ubushinjacyaha busaba ko igihe cy’igifungo cy’agateganyo cy’iminsi 30 cyahawe Rusesabagina cyakongerwa kugira ngo bubashe gukomeza gukora iperereza.

Iburanisha ryaranzwe n’impaka ahanini ku myirondoro ya Rusesabagina. Inteko igitangiza iburanisha, mu myirondoro yasomwe, umwanditsi w’urukiko yavuze ko uregwa ari Rusesabagina Paul utuye mu Mujyi wa Bruxelles mu Bubiligi ariko ufite ubwenegihugu bw’u Rwanda n’ubw’u Bubiligi.

Rusesabagina yahise abwira umucamanza ko bishoboka ko hari ukwibeshya kwabaye mu myirondoro ye kuko we atari Umunyarwanda.

Ati “Nkeka ko umwirondoro mumpa atari wo, ikitari cyo ni uko muvuga ko mfite ubwenegihugu bw’u Rwanda n’ubw’u Bubiligi.”

Rusesabagina yongeye gusubiramo amagambo yavuze kuva ku munsi wa mbere ubwo yitabaga urukiko, ko ubwo yavaga mu Rwanda yabaye impunzi, icyo gihe ngo yakiriwe na Loni atanga ibyangombya byose by’u Rwanda yari afite.

Kuko yari mu Bubiligi, ngo Loni yamusabye ko yaba imfubyi yayo, afata pasiporo y’ubuhunzi.

Yavuze ko bigeze mu 1996, u Bubiligi bwemeye kumwakira, wa mwana wari imfubyi bumuha ubwenegihugu. Ati “Buduha na pasiporo z’u Bubiligi. Ntabwo bwongeye kuduha ibyangonbwa by’u Bubiligi kandi nta n’ibyo twasabye, ku bw’ibyo rero, ntabwo njye ndi umunyarwanda mu buryo bwemewe n’amategeko”.

Ubushinjacyaha bwavuze ko ibijyanye n’ubwenegihugu ntacyo bimaze kuri uru rwego kuko mu maburanisha yabanje byaburanywe kandi bikaba itegeko. Icyo gihe urukiko rwanzuye ko Rusesabagina akiri umunyarwanda by’inkomoko kuko atigeze yandika asaba kubwiyambura.

Me Rugaza David wunganira Rusesabagina yavuze ko urukiko rukwiye gukosora umwirondoro wa Rusesabagina, rukemeza ko nk’uko yabitangiye ibisobanuro, umuntu ruburanisha ari Umubiligi. Me Nyembo Emeline nawe wunganira Rusesabagina yavuze ko ari ngombwa ko ukekwa agira umwirondoro wa nyawo, niba haba harabayeho ikosa, rikwiye gukosorwa.

Umucamanza yavuze ko iyi ngingo yaburanywe kandi igafatwaho umwanzuro kugeza no mu bujurire. Rusesabagina yahise asaba ijambo avuga ko urukiko rutajya rumutega amatwi ngo ruhe agaciro ibyifuzo bye.

Ati “Njye ikibazo cyanjye nk’uko nabivuze, narakivuze nongera ngisubiramo rimwe, kabiri, gatatu. Nababwiye ko no mu rubanza rushize, mu rukiko rwisumbuye, iki kibazo nagisubiyemo, ahubwo icyo ntumva ni uko urukiko ndubwira rimwe, kabiri, gatatu ntirwumve ngo runkorere icyo narubwiye […] niba njye ndi umunyarwanda, irangamuntu yanjye ni iyihe, pasiporo yanjye ni iyihe, unshaka ankura he? […] njye kuri njye ndi Umubiligi.”

Paul Rusesabagina ni mwene Rupfure Thomas na Nyirampara Keiza, yavutse tariki ya 15 Kamena 1954, muri Selire Nyakabungo, Segiteri Nkomero, Komine Murama, Perefegitura ya Gitarama; ubu ni mu Karere ka Nyanza, Intara y’Amajyepfo.

Atuye mu Bubiligi mu gace ka Kraainem-Banlieu mu Mujyi wa Bruxelles. Yashakanye na Mukangamije Tatiana.

Src:Igihe


SANGIZA ABANDI IYI NKURU

LEAVE A REPLY

Please enter your comment!
Please enter your name here