Urutonde rw’amakaminuza yemerewe gufungura amasomo mu Rwanda

0
3725
SANGIZA ABANDI IYI NKURU

Minisiteri y’Uburezi yatangaje ko hari kaminuza zemerewe gusubukura amasomo muri uku kwezi hashingiwe ku igenzura ryakozwe, aho kaminuza esheshatu gusa arizo zizasubukura amasomo zikoresheje ikoranabuhanga ndetse n’uburyo bwo guhura na mwarimu.

Inama y’Abaminisitiri yo ku wa 25 Nzeri 2020 ni yo yatanze icyizere ko amashuri agiye gufungurwa nyuma y’amezi asaga atandatu adakora mu kwirinda COVID-19.

Ku wa 16 Werurwe 2020 nibwo Minisiteri y’Uburezi yatangaje ko amashuri afunzwe mu rwego rwo kwirinda ikwirakwira rya Coronavirus.

Mu Nama y’Abaminisitiri yo ku wa 30 Mata 2020, Guverinoma y’u Rwanda yatangaje ko mu ngamba nshya zo kurwanya Coronavirus, amashuri azafungwa kugeza muri Nzeri ariko ntihari hagatangajwe igihe azafungurira.

Mu kiganiro n’abanyamakuru cyo kuri uyu wa Gatanu, Minisitiri w’Uburezi, Dr Uwamariya Valentine, yavuze ko nyuma y’ingamba zagiye zifatwa mu gukumira COVID-19, byagaragaye ko hari imirimo ishobora gusubukurwa, ari narwo rwego amashuri agiye gusubukurwamo bahereye ku mashuri makuru na za kaminuza.

Yavuze ko kaminuza esheshatu zemerewe gutangira guhera mu kwezi kwa cumi zikoresheje uburyo bwombi, abanyeshuri bari kumwe n’abarimu no mu buryo bw’ikoranabuhanga.

Yagize ati “Dushingiye ku ngamba batugaragarije, izo ni University of Global Health Equity y’i Butaro (UGHE), African Leadership University (ALU), African Institute for Mathematical Sciences (AIMS), Carnegie Mellon University, Oklahoma Christian University na Rwanda Institute for Conservation Agriculture (RICA).’’

Yakomeje ati “Izo esheshatu zifite uburyo buhamye bw’ikoranabuhanga ariko zizanakoresha uburyo bwo kujya mu ishuri, abanyeshuri bagakurikira. Aho ngaho ni abanyeshuri bose bo muri izo kaminuza.”

Hari n’izindi kaminuza eshanu zizafungura hagati muri uku kwezi kwa cumi, zihereye ku banyeshuri bari mu myaka irangiza amasomo, “kugira ngo abasoza bahe umwanya n’abandi.” Ni ukuvuga abiga mu myaka ya 3,4,5 bitewe na porogaramu bigamo.

Minisitiri Uwamariya ati “Bemerewe kuza mu mashuri bigaho bakabonana n’abarimu, ariko na bwa buryo bw’ikoranabuhanga, nka UR yashyizemo ingufu cyane ku buryo bw’ikoranabuhanga kuko amasomo angana na 90% ari mu ikoranabuhanga.”

Ati “Impamvu twatangiranye n’abanyeshuri bake ni ukugira ngo bahane intera, ariko turashaka ko mu ntangiriro baba bari mu macumbi ya kaminuza.”

Muri ayo mashuri harimo Kaminuza y’u Rwanda (UR), Rwanda Polytechnic (RP) hazatangira abo mu mwaka wa nyuma, INES Ruhengeri, Kibogora Polytechnic na Mount Kenya University, Ishami rya Kigali.

Minisitiri Uwamariya ati “Abo bazakoresha uburyo bwombi ariko banazane abiga mu myaka ya nyuma.”

Hari n’ikindi cyiciro kirimo kaminuza enye abanyeshuri bazajya mu masomo bakoresheje uburyo bwo kubonana na mwarimu gusa, ari abo mu wa 3,4,5 gusa, zirimo ULK, Ruli Higher Institute of Health, Learning Institutions, RTUC, na University of Kigali, bahereye mu mwaka ya nyuma.

Ni mu gihe hari amashuri abanyeshuri bose bazajya mu masomo mu buryo busanzwe, ni ukuvuga ILPD na Vatel Rwanda – International Hospitality School.

Minisitiri Uwamariya ati “Ntibivuze ko izindi kaminuza zitazakurikira, byose ni imyiteguro.”

Yavuze ko kugeza ubu hakomeje imyiteguro, ku buryo mu kwezi kwa cumi na kumwe, amashuri yisumbuye nayo azasubukurwa kuko n’ingengabihe zirimo gutunganya.

Yagize ati “Turi gukora gahunda tugendeye ku cyiciro n’umwaka abanyeshuri bigamo.”


SANGIZA ABANDI IYI NKURU

LEAVE A REPLY

Please enter your comment!
Please enter your name here