USA:Umucamanza yategetse ko umwana w’umwirabura wanze gukora umukoro(homework) akomeza gufungwa

0
144
SANGIZA ABANDI IYI NKURU

Ku wa Mbere, Umucamanza yanzuye ko umwana w’umwirabura w’imyaka 15 ufunze azira kudakora umukoro atarekurwa, kugira ngo yitabweho ku buzima bwo mu mutwe no kugenzura umujinya we.

Uwo mwana w’umwirabura witwa Grace ni uwo muri Leta ya Michigan ufunze kuva ku wa 15 Gicurasi 2020 nyuma yo kunanirwa gukora ibyo yasabwaga ku ishuri, hakoreshejwe internet.

Ni urubanza rwababaje benshi bavuga ko rurimo ivangura rishingiye ku ruhu no gushinja ibyaha abana b’abirabura.

Umucamanza w’Intara ya Oakland, Mary Ellen Brennan, yemeje ko uwo mwangavu aguma aho afungiye mu kigo kigorora abana kugira ngo akomeze ahabwe ubuvuzi ndetse ko atiteguye kujya kubana na nyina. Uyu mucamanza yashyize iburanisha ritaha muri Nzeri nk’uko NBC yabitangaje.

Uyu mwana wiswe Grace, aherutse kuvugwa muri raporo yatangajwe mu Cyumweru gishize muri ProPublica aho abanyapolitiki n’abaharanira uburenganzira bwa muntu bagaragazaga ko barakajwe n’ifungwa rye.

Bivugwa ko yazize kudakora umukoro wo ku ishuri, icyaha bavuga ko iyo aba umuzungu atari kugihabwa.

Mu gihe cy’amasaha atatu, umucamanza Brennan yumvishaga Grace ko ari inyungu ze kuguma mu Kigo afungiyemo kubera intambwe amaze gutera.

Yamubwiye ko ikintu cyiza kuri we kugeza ubu ari ukuba atandukanye na nyina, gusa Grace agashimangira ko amukumbuye kandi yiteguye kumwubaha.

Mu mwaka w’amashuri ushize, Grace yigaga mu wa kabiri muri Groves High School muri Birmingham, ryigamo 79% by’abazungu.

Mu minsi ishize, ababyeyi n’abanyeshuri muri uwo mujyi bigaragambije basaba ko yarekurwa akava mu kigo gifungirwamo abana cyo mu Ntara ya Oakland, aho afungiye kuva hagati mu bihe bya Coronavirus.

Umucamanza yahakanye ko Grace atafashwe kubera atakoze umukoro we wo ku ishuri ahubwo ko byatewe nuko umucamanza Brennan yasanze ari ikibazo kuri nyina akurikije ibyo azi. Yavuze ko inshingano ze ari ugufata imyanzuro ku byagirira uwo mwana w’umukobwa akamaro, adatewe ubwoba n’ibyo abantu bavuga.

NBC yanditse ko uwo mwana na nyina bakunze kugirana amakimbirane. Ku buryo ngo akeneye ubuvuzi ku buzima bwo mu mutwe no kugenzura uburakari. Gusa abasaba ko arekurwa bavuga ko kumufunga kubera kudakora umukoro gusa ari uko ari umwirabura, abaye umuzungu batabikora.

Imibare ya ProPublica, yerekena ko kuva muri Mutarama 2016 kugeza muri Kamena 2020, ibirego bigera kuri 4,800 by’abana byatanzwe mu rukiko rw’Intara ya Oakland, ibigera kuri 42% byarimo ab’abirabura.

Imibare yakozwe ku isesengura ry’ifungwa muri Michigan yerekana ko abana b’abirabura bafungwa ku kigero gikubye inshuro enye ab’abazungu.

Umunyapolitiki w’Umunyamerika ubarizwa mu Ishyaka ry’Aba-Démocrates uhagarariye Leta Zunze Ubumwe za Amerika muri Michigan na we yavuze ko iyo Grace aba umuzungu umucamanza atari gufata icyo cyemezo.


SANGIZA ABANDI IYI NKURU

LEAVE A REPLY

Please enter your comment!
Please enter your name here