Uwahoze ari kapiteni wa Rayon Sports, Rutanga Eric, yavuze ko atigeze abanirwa neza n’umuyobozi w’iyi kipe, Munyakazi Sadate

0
73
SANGIZA ABANDI IYI NKURU

Uwahoze ari kapiteni wa Rayon Sports, Rutanga Eric, yavuze ko atigeze abanirwa neza n’umuyobozi w’iyi kipe, Munyakazi Sadate wamusabye guhara miliyoni 9 Frw yari aberewemo no kwishyura andi miliyoni 2 Frw kugira ngo yemererwe kujya muri Police FC.

Rutanga yasinyiye Police FC mu mpera za Gicurasi uyu mwaka nyuma y’uko Rayon Sports itamuhaye miliyoni 7 Frw yasigaye ubwo yongeraga amasezerano mu mpeshyi ya 2019 mu gihe impande zombi zari zumvikanye miliyoni 9 Frw.

Muri Kamena, uyu mukinnyi ukina inyuma ku ruhande rw’ibumoso, yabonye amahirwe yo kugurwa na Yanga SC yo muri Tanzania, ariko birangira atayerekejemo.

Rayon Sports yari yamwemereye kujya muri Tanzania, ariko ikavuga ko adashobora gukinira Police FC ataguzwe kuko yagiye akiyifitiye amasezerano y’umwaka umwe.

Nyuma y’uko ibyo gukinira Yanga SC byanze, Rutanga yasabye Rayon Sports urupapuro rumwemerera kujya muri Police FC, ariko asabwa guhara miliyoni 7 Frw yari aberewemo, imishahara y’amezi atatu n’uduhizambazamusyi (byose bisaga miliyoni 2 Frw) ndetse akanishyura andi miliyoni 2 Frw.

Ati “Yari abizi ko ngomba kujya ahandi kuko atubahirizaga ibyo angomba. Nasabye ibaruwa inkura muri Rayon Sports bandikaho ko injyana muri Yanga SC ndetse bipfuye nagaruka muri Rayon Sports. Nari nabanje kubyanga nyuma ndabyemera. Bipfuye nagarutse muri Rayon Sports kuko nari nasheshe amasezerano ya Police FC ngiye muri Yanga SC.”

“Police FC yahise imbwira ko twakomeza ibyo twari twumvikanye, Rayon Sports imbwira ko kugira ngo njyeyo ari uko nyisinyira miliyoni 2 Frw nka transfert [yo kugurwa], imishara, uduhimbazamusyi n’ibindi narabibarekeye byose.”

Rutanga yabwiye Radio Rwanda ko nubwo yemeye guhara ibyo yagombwaga na Rayon Sports atari uko yari kunanirwa kubiburanira ahubwo umuyobozi wayo, Munyakazi Sadate, atamubaniye.

Ati “Hari igihe wemera ikintu kuko utabuze uko wabiburanira ahubwo kuko hari icyo ushaka kugeraho. Ibaze kuva mu kwa mbere udafata ku ifaranga!”

“Wishyize muri uwo mwanya se urumva izo miliyoni 2 Frw wazitanga mu buhe buryo? Njye ku bwanjye ni we muperezida wangoye. Namufata nk’umuperezida wangoye ku giti cyanjye, utarambaniye.”

Ubwo Rutanga yongeraga amasezerano muri Rayon Sports muri Kamena 2019, impande zombi zari zumvikanye ko nibigera tariki ya 31 Kanama 2019 atarahabwa miliyoni 7 Frw yasigaye, amasezerano ashobora guseswa.

Rayon Sports yashinje Rutanga ko ubwo yasinyiraga Police FC tariki ya 28 Gicurasi uyu mwaka, yari agifite amasezerano kandi akaba atarabanje gusaba ko aseswa.

Mu cyumweru gishize nibwo Rayon Sports yatangaje ko yamaze kwemerera Rutanga kujya muri Police FC nyuma y’ubwumvikane bw’amakipe yombi.


SANGIZA ABANDI IYI NKURU

LEAVE A REPLY

Please enter your comment!
Please enter your name here