Uwimana Patricie avuga ko yatewe umubabaro n’agahinda gakomeye n’umugabo we wamwirukanye amuziza ko yabyaye umwana ufite ubumuga bwo mu mutwe.

0
102
SANGIZA ABANDI IYI NKURU

Uwimana Patricie wo mu Murenge wa Nyanza mu Karere ka Gisagara avuga ko yatewe umubabaro n’agahinda gakomeye n’umugabo we wamwirukanye amuziza ko yabyaye umwana ufite ubumuga bwo mu mutwe.

Uwo mubyeyi wo mu Mudugudu w’Akabakene, mu Kagari ka Higiro afite imyaka 42 y’amavuko, yabyaye abana batatu ariko afite n’abandi babiri arera.

Mu buhamya bwe, avuga ko mu 2001 yashakanye n’umugabo bakabyarana umwana w’imfura w’umukobwa, ariko nyuma uyu mwana aza kugira ikibazo cy’ubumuga bwo mu mutwe wajemo amazi menshi nyuma yo gutumba.

Uwimana avuga ko umugabo we akimara kubona ko umwana wabo agize ikibazo cyo mu mutwe, yahise yirukana umugore na we aragenda kuko babanaga batarasezeranye.

Yagize ati “Se ati ‘twebwe iwacu ntitubyara abana bameze batyo’ ubwo aba anyirukanye mu rugo ngira ubuzima bubi, umwana ndamuzererana mara imyaka icyenda ntagira ahantu mba.”

Yahawe akato n’abaturanyi

Uwimana avuga ko akimara kwirukanwa n’umugabo we, yatangiye gushakisha icumbi ariko aho aribonye yahamara kabiri, bakamuha akato kubera umwana we ufite ubumuga.

Ati “Nasabaga icumbi bakarinyemerera, namara kuritahamo babona uwo mwana bati ‘reka reka icyo kintu kidukurire aha’. Nkagenda byaba na ngombwa hari n’aho nashakaga amafaranga nayatanga bakongera bakayansubiza, imyaka icyenda yose ishira mbayeho muri ubwo buzima.”

Bitewe no kuba muri ubwo buzima bugoye, Uwimana yaje guhura n’undi mugabo yitwaza ko azajya amufasha maze bagirana umubano waje kuvamo abandi bana babiri, gusa ntibigeze babana.

Kuri ubu arera abana batanu barimo uwo mukobwa w’imyaka 18 ufite ubumuga bwo mu mutwe, kimwe n’abandi bana babiri yabyaye n’undi arera.

Yaje guhura n’abagiraneza baramufasha

Muri ubwo buzima bugoye yabayemo, Uwimana Patricie yaje guhura n’Ababikira hamwe n’Aba-Frères bo muri Paruwasi ya Higiro, bamusabira inkunga muri Caritas ya Diyoseze ya Butare, atangira gufashwa kwita ku mwana we no kumuvuza.

Avuga ko umwana we yatangiye koroherwa kandi kuri ubu na we imibereho ye yatangiye kuba myiza kuko yahawe inzu yo kubamo, ibikoresho by’ibanze byo mu rugo n’ibiribwa.

Ati “Banyitayeho mu buryo bushoboka bwose ntacyo nababuranye mu buzima, kugeza ubu Imana ingiriye neza mbashije kubona aho nshyira umusaya, rwose mu mutima wanjye nagira nti ahwii! Kuko ndaruhutse.”

Akomeza agira ati “Umwana kugeza uyu munsi aravurwa kandi azavurwa ubuzima bwe bwose. Hari impinduka yabayemo kuko bwa mbere ataravurwa yari ameze nabi ingingo zose zidakora, ariko ubu ingingo zirakora kuko abasha gutambuka.”

Avuga ko ikibazo gikomeye umwana we afite ari icyo mu mutwe kuko aba ameze nk’uhuzagurika ku buryo bitapfa koroha ko amujyana mu ishuri ngo yige.

Umugabo bari barashakanye akomoka mu Burundi, kuri ubu yasubiye iwabo. Uwimana avuga ko amakuru aheruka kumumenyaho ari uko yiciwe mu mvururu ziheruka kuba muri icyo gihugu.

scr:Igihe.com


SANGIZA ABANDI IYI NKURU

LEAVE A REPLY

Please enter your comment!
Please enter your name here